حسك عينك تنام جنب السواق ..

لو الكمبيوتر بتاعك جنب الشباك

ممكن تقرا الحدوتة دى ع البلوج ده

http://aliquandil.blogspot.com/

أوسكار أسوأ ممثل

مرة عرفت إن (أنطونى كوين ) خدها..معقول ده ممثل جامد !! والله تعاطفت معاه،ومع أى حد خدها

لحد ماخدتها...أوسكار أسوأ ممثل،طبعا هو مش أوسكار ومش تمثيل..دى مسابقة عملها الزميل الفنان

هشام رحمة..على الجروب اللى عملة على النت

http://www.facebook.com/group.php?gid=2379902852

هشام عمل مسابقة للرسامين اللى ف الجروب يرسموا عنترة بن شداد،و أنا رسمت معاهم لكن

يظهر كنت فاشل فى تمثيل شخصية عنترة...أنا مش عنترة؟؟؟ غريبة كنت فاكر نفسى دكر ..المهم أنا

أخدت صوت واحد بس ...يعنى اللى معروضة دى أسوأ رسمة ف المسابقة

الغريب برضة انى مش زعلان ياترى هو ده كان احساس (أنطونى كوين) ياللا المهم..متعوا

عنييكوا بالرسمة .. مخ مخ

!! الرقاصة جت

مجرد خطوة بسيطة أو لفتة يمينا أو يسارا ،كانت تهتز كل دهون جسمها الأبيض

الرقاصة اللى جت ف الفرح اللى تحت بيتنا ف امبابة..مكنش رقص.. فقط اهتزازات دهنية

ناس يتخانقوا عشان يرقصوا معاها،وناس يقعدوا تحت رجليها ولما تخلص الرقصة تغطى تلك الدهون

البيضاء بعباية سودا وتتكوم فى جنب المسرح بجوار الطبال .. يديها سيجارة

اختفت ابتسامتها العريضة بمجرد ماخلصت الرقصة؟

ياترى لية مارحتش تشتغل خدامه ف السعودية.. هو خدامة أحسن واللا رقاصة أحسن؟

300

دخلنا فيلم (300) و أصابتنا الدهشة

مش عارف ليه رسمت قنديل فى زى الاسبرطيين

يمكن فية روح مقاتل

http://qindeel.blogspot.com/

meta إتش meta

عفـريت رسم

ده اللى كنت باقولة

لما كنت باتابع الكوميكس بتاعة فى المجلات

مش ممكن ياجماعه

رسام بجد

ودمه خفيف اوى

كنت فرحان جدا لما اتقابلنا ورسملى فى الاسكتش بتاعى

ياااااااااااااااااااااااااااااااه

هاعرضهالكوا بعد ماتشوفوا البلؤ بتاعه

http://metahatem.blogspot.com/

رقص كمارو

سلام الى كل من يحمل رتبة بلوجر أو يحمل رتبة انسان

انا مش عارف مر كام يوم على وضع اخر بوسط والرد على اخر كومينت

لكن اعذرونى... دى اكتر حاجه باعملها بمزاجى مش معقول هاكون ملتزم فى دى كمان

ماكانش عندى حاجه اقولها

واللى خلانى أحط البوسط ده ...هى الدهشة

الدهشة اللى حصلت لى !! لما شوفتها

اكتشفت ان الدهشة بتخرج الانسان من موود الاكتئاب،يمكن الاكتشاف كان متأخر بس كان عملى

كان فى حالة ملل .. راحت بالدهشة.. رؤية غير المعتاد

دهشتك ف اللينك ده

http://www.youtube.com/watch?v=jmtS_Knx85E

خمسة مخلوفيزم

بناء على طلب التوتة البورسعيدية (تسنيم) اكتب خمس حاجات محدش يعرفها عنى ف الكون

غير ربنا المبدع العظيم............ استعدوا للفضايح

------------------------------------------------------------------------------------

وأنا صغير كان نفسى اطلع مغنى موسيقى جاز

--------------------------------------

اكتر حاجه دلوقتى بتخلينى ابتسم ابتسامة عريضة من قلبى لما أكلم (سارة سويدان) فى التليفون

وأول كلمة تقولهالى -صبح

-------------------------------------------------------------------------------

عندى حلم نفسى احققة جداهو انى أمشى فى الشارع -بالاندر ويير- بس أروح بيه الشغل واقعد بيه ع القهوة

ومعايا الشنطه والموبايل والمفاتيح ولابس الكوتشى الجينز بتاعى من غير شراب

------------------------------------------------------------------------------------

انا باخاف من الحلاق زى العيال الصغيرة عشان كده شعرى دايما كبير

--------------------------------------------------------

لحد دلوقتى مش قادر أنسى ءايمان

---------------------------

أبطال الصور

باهر

سليمان

محروس

موودى

مخ مخ

تسنيم كان فى فضايح اكتر بس انتى طلبتى خمسة بس

منك لله

comic strip

نشرت هذه الكوميكاية فى مجلة (الاذاعة والتليفزيون) هذا الاسبوع فى باب (شباب يجن) الباب اشراف طارق امام

.............................................................................والكوميكاية سيناريو طارق ورسومى يارب تعجبكم

الشىء.. لزوم الشىء

بلوج من غير جمهور.. زي جمهور من غير بلوج
حتى لو الاتنين وحشين...... لازم تواصل
محمود صاحبى عامل بلوج من فترة
البلوج عاجبنى ... لكن محتاج زباين
عفوا.. قراء
زوروة يمكن يعجبكم

http://moodysworld1.blogspot.com/

ملحوظه: ممكن تعتبروا ده اعلان غير مدفوع الأجر

هى القـطط عاوزة ايه ؟

لما قابلت حد مغرم زيى بالقطط كان طبيعى نتصاحب ( طارق ءامام) صاحب الروايه الرائعه (شريعة القطة) قعدنا واتكلمنا ورسمنا.... عن البنات والحب ، البنات زى القطط و القطط زى البنات ... منها السمرا والشقرا والخمرى والبيضا السمينه.. منها اللى بيخربش ويعض ومنها اللى يتمسح فيك لما يحتاج للدفا ، قطها تسيبها........بنت تسيبك.... الحياة بتستمر .

رسمة القطة اللى فوق لطارق ءامام

رسمة الفار اللى تحت خالص للفنان وليد طاهر

شكلى أخدت برد

بتحبوا الشتا....؟

مرة واحد قاللى: ان مصطفى قمر صوته شتوى

بشرتى بتتعب م الشتا.... دى واحدة كنت باحبها..

بص ...مناخير حمرا...قالتهالى البنوته 7 سنين

أنا شخصيا باحس ان الشتا أهدى ... وأنظف

لكن فى سؤال غريب جه ف بالى

هو القـنـفـد بيبرد ؟!؟

الحاج مصطفى رحمة و ولده هشام رحمة

عرفنا الفنان هشام رحمة من خلال رسومه
قبل أن نقابله شخصيا... الجنرال عمرو سليم
احضر رسوم هشام وقال انه هايشتغل معانا
لا شك ان هشام متأثر بوالده الفنان مصطفى رحمه
الذى نشأ جيل كامل على شخصيته فى مجلة ماجد
شخصيه كسلان جدا
بالمناسبه هى قريبه من شكل هشام
مع ان الفنان مصطفى رحمه صممها فبل هشام
مايتولد
ماعلينا....................المهم
الرسوم بتاعة كانت بالقلم الرصاص
وحازت اعجاب الجميع
كان فيها روح
هشام تخرج من المعهد العالى للسينما عام 2004
قسم الرسوم المتحركة
خريج طازة
ولكنه لم يعمل فى مجال الرسوم المتحركة او الكارتون
غير الفلمين بتوع مشروع التخرج
ولكنه اشتغل فى مجال الكوميكس او الأستربس
مجلة توت
وباسم
وصدر نفسه للعالم كرسام كاريكاتير أول مرة من خلال جريدة الدستور
ودخل المعمعه
أشعر دائما أن هشام رحمة رسام كاريكاتير أرستقراطى
عاش طول عمرة فى الأمارات
ودائما يشتكى من الشيشه فى قهاوى وسط البلد
وبيحلف بشيش قهاوى مصر الجديدة
حظوظ
أنا باحب رسومات هشام جدا
وكاريكاتيره اللى عن الفقرا
وبحبه لما يرسمنى ... بصراحه بيخلينى اجمل
اللى خلانى اكتب عن هشام انه صدرله كوميكسايه فى مجله علاء الدين
بتاريخ 9 نوفمبر 2006
وغلاف كمان.... سيناريو وائل سعد
كتبها حلو أوى
وهشام كمان رسمها حلو أوى
......أكتر حاجه كانت مخوفانى على هشام بما انه من الأمارات لمصرالجديده
انه يدخل الجيش
لكن الحمد لله أخد تأجيل .......... وسافر الأمارات
قال انه هايستجم شهرين
حيث الروقان والنظافه والجمال والحاج مصطفى ابوة كمان هناك
.......... ورجع
الغريب لما رجع أنه بقى يرسم كل الناس تخان
تخان بجد
معرفش ليه؟
http://hichamrahmah.blogspot.com/

ده عنوان البلؤ بتاع هشام رحمه
http://hichamrahma.deviantart.com/

وده لينك تانى عارض عليه شغله
بلؤ أفرنجى

سامحونى لو كنت طولت عليكم
مخ مخ

العربيه فاضيه قدام يا حضرات

الأتوبيس بقى كائن يعيش بينا نستعمله ويستعملنا
لا أعرف لماذا من وأنا عيل .. أجمع تذاكر الأتوبيس تستهوينى أشكالها وألوانها
فئه الربع جنيه .. والخمسين قرش
حمرا
زرقاء
صفرا
وأحيانا الوان غريبه من سوء الطباعه
ارسمها واعمل بيها كولاج

طبعا كلنا ركبنا الأتوبيس ومازلنا ... عشرة عمر يعنى وفوقنا مهارات السيرك الروسى
الركوب والنزول .. وهو الأتوبيس ماشى
ومط اجسادنا للتعديه وسط كتل البشر المحشورة فى 99 بشرطة أو7ج
أقوللكم
اذكر فيما لا يزيد عن خمسة أسطر موقف حدث لك مع الأتوبيس
ومحدش يقوللى مفيش.
مخ مخ

blogger

عندما يكون الانسان ... مجرد انسان

يحصل مع الوقت على عدة رتب ... ليست رتب عسكريه ولكنها رتب اليكترونيه تبدأ بشرائه للكمبيوتر وعمل أول ايميل فى حياته الان يستطيع ان يتواصل مع اخر نقطه فى العالم ............... يغوص فى عالم النت ويترقى بلوجر او يعمل موقع

لحد مايموت

المهم انى دلوقتى ......بلوجر

Banotة

استفتاح البلؤ
رسمت البنوته دى اللى بس هى لسه ماطلعتش للنور
انا باحبها عشان كده
خليتها استفتاح البلؤ
يارب تعجبكوا
تفتكروا ممكن نسميها ايه؟

بلؤ

....... هاحاول
أعرض الشخابيط والافكار والشغل
على البلوج ده ..........فى احتمال كبير انها ماتعجبكوش
بس انا عاوز اعملها

أنا

ده أنا
عشان تعرفونى
الأول